最近名為「自私的迷因（生態環境部）」（@the_selfishmemes_hk）的專頁在Instagram迅速竄紅，只是一個月已有近千人追蹤，超越了不少生態專頁。他們以迷因（Meme）為圖介紹生態、諷刺時弊或郊野陋習等，間中更會夾雜一些富資料性的文字，或相關團體的連結，以輕鬆手法表達有深度的內容。似乎除了有趣搞笑以外，還想帶大家探討更深一層的意義。
自私的迷因幾乎每日一帖，其中一個Meme就用了一個沒有實質作用的閘門，來諷刺漁護署執法無力（圖一），又借用最近在Instagram 瘋傳的Tag「敢不敢放上5年前的自己」，來諷刺紅花嶺郊野公園計劃28年來毫無進展（圖二）。
成員隨性伙合 集各家之所長
記者有幸能訪問，才發現原來編者人數眾多，遂邀請他們逐一自我介紹。由於他們都不希望公開身份，當場就討論用甚麼化名好：阿月渾子、修端、有容、笑四、烏鴉、中東凱晴⋯⋯當問及個人背景時又爭相說是地獄來的使者，到記者把文章寫好了，有些都還沒有把名字決定好，果然都是隨性而行的人。
對於用Meme來解說新聞議題，阿月渾子說是「戇X的事認真做，環境議題一向都係票房毒藥，但唔代表佢唔重要呀嘛，所以都係要講，不過就換個方式講。」笑四說：「環境界有好多荒謬嘅嘢，Meme嘅精髓在於佢可以突顯到嗰個好荒謬嘅位，將佢變到好好笑，令人容易明白重點，而好笑嘅嘢就會多人Share，分享喜悅呀嘛！」
「自私的迷因」這個名字聽來摸不着頭腦，但原來出自生物學家名著«自私的基因»（The Selfish Gene），為英國演化生物學家理察·道金斯（Richard Dawkins）於1976年的著作，他指，基因（Gene）作為遺傳物質的載體，目的就是傳播，透過不斷複製，最後成功的就會留下來，但他認為人類社會中，文化基因已勝過基因的力量，於是他稱這種文化基因為 Meme，後來再由網絡演化，大家現時都將這類搞笑又極具諷刺意味，傳播力極廣的圖片，視之為Meme。
自私的迷因的成員都是對自然環境、生態及保育議題有想法的人，並各自有關注的範疇，由環境政策、動物保育、海洋保育、地緣政治，以至各樣生態、普及教育及入侵物種等。他們有的是在非牟利機構從事教育工作、也有的從事環境保護相關工作、生態研究，或是業餘生態愛好者。問到當初如何物色成員加入，阿月渾子和笑四笑說只是「朋友搭朋友」去問，並沒有故意找不同專長的人，「主要都係啱Feel，大家都係啲癲癲哋嘅人。後尾發覺可以咁樣聚集到一班唔同背景嘅人，好似都幾好。」他更透露成員間常互相戲弄，衡仔更常被瘋狂抽水，不過他不太介意，甚至有點樂在其中，「我不嬲覺得唔識得『自抽』嘅人係冇乜幽默感，所以如果連依啲都玩唔起，我諗一開始都唔應該話開Meme page。」
不滿公關洗白 有限資源抽水
至於自私的迷因成立的原因，阿月渾子表示，「一開始係睇唔過眼剩係得大嘥鬼、B仔呢啲PR（公關）公司成日抽水，食晒啲Trend，佢哋又多資源、又快，快到有時係我都唔知佢抽緊咩水。」笑四笑道：「咁係你慢喎！我覺得最嬲係，大嘥鬼仲要喺度求橋！每年收過百萬，收人咁多錢，我都冇求過橋佢求橋！」由於大嘥鬼代表的是環境局，一直關注環境議題的他們更感到不憤，即使自覺能力有限，仍希望能提供多一個接收資訊的選擇給大眾。「起碼唔好因為佢（大嘥鬼）講嘅嘢好Fun，就覺得政府做嘅嘢係德政。其實佢只係一間公關公司⋯⋯啲人好開心咁Share，其實係參與咗人哋嘅洗白過程。」笑四續道：「有好多環團都想Catch個Trend 去抽水，但真係冇資源。」不同團體都有自己形象要照顧，如果用團體名義發文，多是內容主導，又要求有充足理據，「要做到哂以上，又要好笑，係做唔到。搞到而家時興嘅Trend都俾政府用埋，冇咗啲Raw 啲，會講啲過火嘢嘅Humor page。 開Meme專頁自由度大好多，因為冇底線，又唔使Care funding。」笑四又再說，「成立專頁都可能因為工作中嘅壓抑間接促成……環境普及教育嚟講，呢度太偏激，我公司就做唔到。」
輕鬆帶出議題 冀打破同溫層
成員衡仔和烏鴉本來己有自己的專頁，從事教育的烏鴉不時用來分享自己對自然生態和保育的想法，熱愛生態研究和攝影的衡仔則用來分享自己得意的攝影作品，希望能「話俾多啲人聽，香港其實係有生態，值得大家保護。」雖然他們都曾嘗試用不同方法去接觸更多觀眾，卻發現很難離開同溫層。因此受邀後，二人二話不說就決定加入，希望用輕鬆的手法可以令大家討論那些本來複雜、社會中較少人關注的議題。衡仔覺得，「而家叫撞彩咁接觸到好多行山圈嘅人，都算係Achieve 到啲嘢㗎啦。」阿月渾子則表示，「原本對個Page無咩期望，如果冇人睇，咪我哋自己圍爐自己笑囉，如果令呢個圈嘅人，都可以Leisure啲咁睇多啲新聞都係好事。因為當我哋埋首自己有興趣嘅事上，會唔係好知出面發生緊咩事，未必個個都有精力再去睇哂個大畫面，或者搵啲Content出嚟，可能唔知道原來有啲政策已經進行緊。」
自私的迷因廣受歡迎，他們都表示開心，烏鴉說：「當咁多人都睇你出Post嘅時候，有時都需要認真諗吓，下一個Meme想帶出啲咩⋯⋯帶出嘅議題唔係一兩句啱定錯咁簡單，有時亦間接反映出我哋對待自然生態嘅態度。如果令你有共鳴笑咗一聲嘅話，不妨諗多少少點解呢樣嘢會成為一個Meme。」
記者：Iris
圖片：由受訪者提供
香港行山雜誌 | 遠足 | 遊記路線 | 報道 - 風火山林 