新朋友報到 － 1月回顧

1月18日（日）川龍早茶◆城門野餐

十隻恐龍去野餐，冇得坐旅遊車，要靠自己兩條腿。一早由荃灣集合，坐小巴到川龍山水茶樓食個Bruch，品嚐傳統中式點心，已經食到飽一飽。之後經龍門郊遊徑，到城門水塘，龍門郊遊徑上落不多，雖然有些路段比較斜，但基本上都輕鬆易行。途中經過大圓石澗N條（因為唔知邊條先係），更有流水小橋。到達城門水塘之後，在草地旁邊白千層樹下野餐，大家都準備了大量食物，新朋友Chris原來是廚藝高手，準備了薰蹄、麵包布丁，Kimmy更加將整間阿信屋帶上山，準備了無盡的零食。除此之外，大家還準備了Muffin、大量水果、生命麵包、五香肉丁、撈烏冬……荒山野嶺任食放題。

1月25日（日）決戰大坡板

一年半前決戰大坡板，因為淆底，去到大坡板入口坐咗成個鐘然後走人，出番油塘食下午茶，今次一行5人再戰鯉魚門海岸！重臨舊地，未挑戰大坡板前，係舊礦場先玩跳相，瘋狂一下，忘記恐怖陰霾。

之後開始挑戰，大家一開始都被大坡板的斜度嚇了一跳，唯有有時行進，有時用屁股行進，邊行邊坐住過大坡板。順利過咗大坡板之後就開始平緩一點，但都有點攀爬位。我哋係一個大岩石上坐下休息，享受759特價咖啡，之後過了不少險位，又過了獨木橋，最後由沙灘旁邊的鐵梯番上馬路，都幾體力化，超肚餓，最後落調景嶺食嘢。

2月1日（日）禾秧狂操兩文三語
上次路過禾秧石林但未能一戰，今日一行12人再上禾秧山戰石林。今次我們有Nok帶來幾位外國朋友，但還有來自台灣的維倫加入，可以好好練習兩文三語，由荃錦坳出發上山，但由於太大霧，過禾秧山的時候有點迷路，經高手指點，來到禾秧石林，登上王母點將台。落山的過程中，大家又上了一塊大石合照，一試身手，之後落到圓玄學院去廁所散水。

2月8日（日）獅子頭上嘆紅酒

之前多次登獅子山，今次是Ally和朋友Spring邀約重登獅山，一行八人包括三位非常可愛的台灣朋友，都是維倫的同事。先在黃大仙吃飽飽出發，直上沙田坳道，經麥徑登獅子山。一路都比較輕鬆好走，就是臨到山頂的梯級比較長、比較斜。大家爬上路邊的大石休息拍照，從前都只有華生和何Sir兩個人會爬上去 。大家成功攻頂之後，就在獅尾開紅酒、嘆火腿。在獅子山的山脊線上橫移，再登上獅頭，九龍的全景今天卻有點矇矓。齊齊落山，之後落樂富麻布茶房Tea一Tea。

原刊於《風火山林月刊》第八期　２０１５年２月１５日

立即訂閱，享受每期精彩內容，和我們一起翻山越嶺。