大夥兒出巡 － 11月回顧

11月16日（日）自殺崖上醫畏高
受盡詛咒的自殺崖，在多次改期和取消之後終於搞得成！三名壯丁由順利出發，上飛鵝山道，由飛鵝山道1號轉入山路，初時路段並不算太陡峭，之後一直急上，非常費力，上山途中有不少懸崖大石可以玩石影相，我哋轉入左面的「高危」路線，其實都唔算危，亦見到有人玩攀石，同時又有行山人士在自殺崖另一邊，徒手由崖底夾石縫上崖頂。我地玩過鸚鵡石，又踩草頭走出無敵懸空大平台，上到崖頂大休食橙。之後轉入飛鵝山頂，經象山回到扎山道落山散水。一路上山不停地望住個懸崖，真係咩畏高都醫好晒！

11月23日（日）Totally Old Road
半走元荃古道，兩日正式歸隊，加上新朋友，一行九人，人才濟濟，由荃灣出發，經元荃古道到深井，先過上下花山，一開始上山已經有點辛苦，但是休息吓又行吓，加上風景開揚，心情輕鬆。在上山路邊更有一處路邊有芒草，同時旁邊有紅葉，一次過睇晒芒草紅葉，唔使上大東入大棠。之後在山頂玩石，一覽荃灣及青衣，於清快塘賞蓮花，落深井終於食到大大隻美味燒鵝！

11月29日（六）大埔滘螢火蟲之夜
因天雨取消的螢火蟲之夜終於成行，一行23人在大埔集合，出發到大埔滘自然教育徑欣賞螢火蟲。一開始起行就已經見到有人看蠍子，山坡上的蠍子在紫光燈下變成螢光綠。之後一行人由車路轉入山路，行走自然教育徑藍路，到達一個草坪休息點，在草坡之上見到發光的螢火蟲幼蟲。之後一路見到零星螢火蟲，在溪澗河流附近比較多。回到馬路之上，又會忽然有非常光的螢火蟲由左右飛出，大家見到都不禁「嘩！嘩！」驚呼。

12月7日（日）手騰腳震決戰中狗牙
挑戰路線好少玩，今個月就一次過玩晒自殺崖加   ，人稱最經典考牌路線，一直都希望可以一試身手，今次一行三人，由石壁郊遊徑出發，經中狗牙上山，路口有甩色「中狗牙」字樣，不停死爆上山，又斜又難行，有時是浮沙碎石，有時又需要手腳並用爬過大石。一路爆上山，一路望住右面的深谷，不知道是累，還是驚，真係「一步一腳震」，隨時拜拜。到達和東狗牙連接路口，旁邊就是虎吼石河，落石河玩咗一陣，整個山谷氣勢磅礡。休息一會，再過著名的一線生機，其實唔險（雖然兩面都係崖），之後在一線生機大休，遇上德仁仔醬爆生山團，吹下水影下相，一齊上閻王壁，這個時候就見到Action Asia Event的參加者，由西狗牙上山，過閻王壁，上鳳頂，落伯公坳，再上大東，真係痴線。我哋都係上鳳凰山頂，落伯公坳散水，拜拜。

原刊於《風火山林月刊》第六期　２０１４年１２月１４日

立即訂閱，享受每期精彩內容，和我們一起翻山越嶺。